俄羅斯猛火客W開餐！

猪拉多纳

只有贏波先有機會出線嘅希臘，今晚喺A組最後一輪分組賽挑戰小組「一哥」俄羅斯，領隊費蘭度山度士雖然話明陣容會大執位，不過咪話力奇睇死希臘，佢哋班波根本漏洞多多，無論點變都惡唔出樣，對住有新舊沙皇愈戰愈勇嘅俄羅斯，肯定唔會有運行，更難望再創04年捧歐國盃神話，一於撐俄羅斯1.75倍客勝！（now633及635台、中央5台周日凌晨2:45直播）

希臘2戰得1分，揭幕戰和完波蘭，上輪不敵捷克，今場贏波仲有數講，否則打和或輸波都可以執包袱返屋企。領隊費蘭度山度士都知衰，話明今場要變變變，希望變出新血路，當中有焗住變嘅門將查爾基亞斯，佢會因傷缺陣，由施費基斯頂替。中堅方面，上仗停賽嘅柏柏斯達夫普路斯今仗會復出擔正，同佢拍檔嘅則係柏柏杜普路斯，3場波防守鐵三角用咗3個唔同組合，唔係仲敢奢望佢哋有默契啩？

中前場方面，上仗傷愈復出嘅科達基斯繼續正選，但對捷克後備登場嘅美度古則可能取代森馬拉斯掛帥，拍住老將基卡斯攻堅，不過以佢哋嘅質素，睇怕變極都冇咩料到，真係咪寄望太高至好。

另邊廂嘅俄羅斯，上仗雖然同波蘭打和，然而出線主動權依然喺手，喺領隊艾禾卡特指揮下大踢進攻足球嘅佢哋，433陣式效率足球演繹得淋漓盡致，其中新星迪沙高耶夫2仗入3球，更加搶盡鏡頭。
俄軍保首名唔手軟

俄羅斯唯一令人失望，就只有正中鋒基沙哥夫，幾乎搵次射門中框都冇，不過賽前有消息指佢哋將會改用近2場後備上陣都踢得好生嘅柏夫里約真高頂上，估計火力更強，雖則話俄軍今仗和波都出線，但為保首名可以走線輕鬆啲，今晚點睇都唔似會放過希臘，客勝開得出o架！
橫數千軍

希臘慢熱上半場少射門

‧近10次鬥俄羅斯僅1勝，而且已經係20年前嘅事。

‧自04年奪標後，喺歐國盃決賽周5戰得1和4負。

‧近11戰均有入波，近23戰僅2敗。

‧今屆分組賽2戰上半場合共僅得3次射門，下半場累積有11次。

‧歷來3次踢最後一場分組賽得1和2負。

俄羅斯決賽周恰慣希臘

‧近16個月來16戰不敗。

‧新星迪沙高耶夫近4場國家隊正式比賽入6球。

‧對上2屆歐國盃決賽周均曾挫敗希臘。

‧歷來3次踢最後一場分組賽得2勝1和。

‧球隊近7個入球有5個係由艾沙維射入或助攻。