沈集成自購馬先聲奪人

猪拉多纳

雖然沈集成依家身在英國，為聽日跑國際一級賽皇席錦標嘅「小橋流水」備戰，尋日冇喺沙田馬場親自督師。不過，就算倉主唔喺香港，都冇影響馬房攻勢，旗下嘅「先聲奪人」就喺第七場三班泥地1650米首戰即贏，在安國倫胯下爆出28倍冷Ｗ，亦是沈集成繼早排「總統之光」後，另一隻一出即勝嘅自購馬，日後不妨吼實沈廐初出PP。
       
先聲奪人初出即勝，名副其實。
美國種初泥即勝

不過聽「先聲奪人」嘅馬主葛鑑賠講，雖然今鋪初出票數冷落，但佢自己其實就有啲信心，事關呢隻馬係美國種，同埋嚟香港之前跑膠沙地嘅成績都唔錯，加上本身血統偏長，所以今勻初出跑泥地一哩都預計愛駒會跑得近。不過，葛生話呢隻馬喺英國已經跑至2400米，但佢相信嚟到香港可以跑番短啲，日後跑二千最合腳法，前景不差。