烏克蘭難敵三獅兵

猪拉多纳

王牌告別戰後備席上演？烏克蘭大佬舒夫真高暗示過，踢埋今屆歐國盃比賽後考慮掛靴湊仔，即係話假若烏克蘭今晚喺D組壓軸戰贏唔到英格蘭出線，今場隨時就係「軍刀」嘅告別戰，最慘係佢近日膝部積水，今場上陣機會只係五五波！相反英格蘭就有首席球星朗尼回歸，加上吸取過俄羅斯輸波出局嘅教訓，三獅兵今晚必定全力開火，2.02倍客勝捧得過。（now632台、廣東體育及中央5台周三凌晨2:45直播）
朗尼回歸拍韋碧克攻堅

英格蘭上場對瑞典贏得驚險，令唔少粉絲一額汗，當中佢哋2個失波都係來自死球，防守死球時明顯係自視過高同唔夠集中，不過「亨利」相信鶴臣上場賽後一定會捉住班後防大哥照肺，以免重複犯錯。

何況今仗更係左閘艾殊利高爾歷來喺世盃同歐國盃決賽周嘅第21場賽事，將打破之前由施路頓同碧咸攜手保持嘅20場上陣紀錄，睇怕佢都唔想喺呢場重要戰役失波掛！

前線方面，萬眾期待嘅朗尼終於復出，就算後備快翼禾確特因傷缺陣，英格蘭嘅火力依然肯定以倍數提升。賽前消息指，朗尼將取代安祖卡路爾擔正，拍住佢喺曼聯嘅拍檔韋碧克攻堅，默契十足更令呢對組合威力大增，就算大軍尋日因為當地落雨，搞到冇得去今場比賽嘅當巴斯球場練波，但係天氣預報話今日風和日麗成30度，使乜驚呀！
舒夫真高膝部積水冇練波

主隊烏克蘭2戰1勝1負得3分，今場唔贏唔掂。可惜王牌射手舒夫真高因為膝部積水，日前連練波都唔掂，尋晚就有出席操練，但今晚上陣機會亦只得五成。不過就算最終佢帶傷上陣，發揮都難免受影響，仲可以寄望幾大吖，烏克蘭今場凶多吉少，如果「軍刀」之後真係決定掛靴，惟有喺度提早祝佢一路順風啦！
三獅兵大賽上陣紀錄

場數 球員

20場 施路頓、碧咸、A高

19場 奧雲

17場 連尼加、蘇甘保
橫數千軍

 烏克蘭射門命中率列強最低

‧歷來4鬥英格蘭得1勝3負。

‧主帥布洛堅與英格蘭主帥鶴臣係列強最遲上任2位領隊。

‧陣內21位球員來自本土聯賽，僅次於英格蘭嘅23位土炮。

‧喺今屆決賽周射門命中率只得21%，為列強中最低。

‧歷來喺大賽所入7球，有4球由舒夫真高取得。

 英格蘭破門靠傳中波

‧歷來喺歐國盃決賽周3鬥主辦國得1和2負。

‧喺鶴臣領導下4戰得3勝1和。

‧踢完2輪後，21次射門取得4個入波，19%射門成功率冠群雄。

‧今屆賽事4個入球中，有3球靠傳中波製造。

‧踢完首2輪後僅錄得17次犯規，係列強中最少。
亨利推介：

英格蘭（客勝）