堤格雷聖羅倫素搶分救命

猪拉多纳

今輪係阿甲秋最後一輪賽事，周日同時間開賽七場賽事，將決定秋季聯賽錦標誰屬，以及邊支球隊陪同奧林普直接降班。以目前情況嚟睇，堤格雷同沙蘭迪兵工廠並列榜首，應可贏波再踢附加賽決定冠軍誰屬；榜末則以聖羅倫素形勢最兇險，就算贏波仍要視乎榜尾其他球隊成績，先至決定生死。不過，「睇人面色」之餘都要做好本分，阿King一於撐三支具贏波決心嘅球隊堤格雷、沙蘭迪兵工廠及聖羅倫素主場贏波謝幕。（周一凌晨2時開賽）

未談今輪賽事前，先講一啲降班小資料。由於阿甲降班係計算近三季成績，所以排第二嘅堤格雷就算最終贏得秋季聯賽冠軍，仍有可能降班。以現時形勢，聖羅倫素與堤格雷形勢最兇險，前者就算主場擊敗聖馬田聖祖安，亦要視乎榜尾其他球隊如班菲特和拉費爾拿嘅成績，才能決定自己命運；而堤格雷今仗就算贏波，亦未必保證護級成功，假如拉費爾拿同時擊敗葛度爾古斯，堤格雷就要出戰護級附加賽。

聯賽錦標對堤格雷來說並非球隊最大動力，反而希望藉贏波以較佳成績完成今季及逃離降班區域才是最大目標。堤格雷主場戰績彪炳，近六仗錄得全勝佳績，相反今仗對手獨立隊今年作客僅贏一仗，而且近六仗更未嘗勝果。雙方戰績可說高下立見，一於撐堤格雷主場再贏一仗。
沙蘭迪爭標一定搏

另外兩場賽事，聖羅倫素比起聖馬田聖祖安更需要救命三分，因球隊落敗便肯定降班；相反後者即使輸波亦未必會降班，最差情況只會跌入降班附加賽區。聖羅倫素主場贏波決心較大，今場捧得過。沙蘭迪兵工廠今仗可說為冠軍而戰，有主場之利加上對手貝格拉諾自取得足夠分數肯定下季可續戰阿甲後，近期已放軟手腳，相信今仗唔會阻沙蘭迪發達。