曼聯大起阿積士開普敦

猪拉多纳

曼聯南非之行尾站會同阿積士開普敦拍跳，「紅魔鬼」首仗行住踢小勝一粒跣死無數上盤客，匆匆再戰仍令人有戒心。經過一場熱身後，曼聯眾星料會開始上力，新兵香川真司勢將正選登場，前線必更具侵略性，但大軍後防天殘地缺存隱憂，未必可保不失，捧入球大最好！（now 640周六晚９時直播）

「紅魔鬼」上場對阿馬祖路上半場入波後不思進取，最後小勝一比○收工，球員始終未上力，好難要求太高。曼聯主帥費格遜上仗下半場主要換班小將入嚟玩吓，本來尾段諗住畀新兵香川真司打十分鐘左右，點知長期冇死球換唔到人，結果香川踢得四分鐘，老費晨早預告呢位日本球星今場會擔正，新七號仔路爾斯華倫西亞亦有望登場，預期對手會承受頗大壓力。
紅魔防線漏洞多

曼聯射手查維亞靴南迪斯上場踢到有啲抽筋，明顯未在狀態，另一箭頭貝碧托夫跑動甚多，睇落都幾弗，加上熱身賽之星馬捷達在陣，絕對有足夠人手撕破敵軍防線。不過，「紅魔鬼」後防只得守將里奧費迪南擔大旗，仲要搵年輕左翼羅比巴迪串演左閘，予人拉雜成軍之感，上場陣上一再出現甩漏情況，如非對手把握力弱已經失守，大軍現時人手有限，好難執得掂。
阿軍主場實同你攻

阿積士開普敦屬荷甲班霸阿積士南非分會，阿積士本來希望喺非洲發掘球星，但多年來成功例子唔多，僅得南非國腳派拿較具質素。阿積士開普敦現時由前阿積士青年隊教頭馬頓史基倫堡領軍，會方早前引入格蘭寧根中場雲達歷克，但此子有傷在身難望披甲。大軍計級數應在阿馬祖路之上，一眾球員都想喺曼聯身上爭取士哥，唔會齋守，相信入波唔少，要入球大！