洛杉磯打吡爆發入球騷

猪拉多纳

聽朝早美職上演「洛杉磯打吡戰」，由掛名主場嘅洛杉磯銀河迎戰美國芝華士，走勢飄忽嘅銀河雖然火力強勁，奈何防線始終唔多穩陣，小妹真係唔敢捧佢哋贏波，博1.9倍入球大實際啲。（開賽時間：周日早上10:00）

兩支洛杉磯球隊都係共用一個主場，關係同米蘭雙雄一樣都係世仇。兩軍比較無疑以銀河星味較濃，不過單睇名氣絕對唔可靠，皆因班銀河巨星多數集中喺中前場，防線由二打六孭飛，自然唔多靠得住，近期除咗對芝加哥火燄保住清白，其餘4場都至少失2球，難怪近5場夾夾埋埋失咗11球之多，上一場如果唔係靠門將祖殊桑達斯嘅精彩演出，加埋條門楣擋幾下，絕對唔止失兩粒呀！就算對手美國芝華士係全美職入波最少嗰隊，都絕對有機會偷雞入波o架。
銀河近7戰開6場大

好彩嘅係銀河雖然防線不穩，但勝在前線夠晒銳利，碧咸落選奧運隊後明顯成個人着晒火，近兩場入咗3粒擔當「救世主」，羅比堅尼、當路雲近排又終於回復應有水準，新秀荷西維拿利爾亦喺上場取得首個職業入球，可望以攻代守，有力延續近7戰開6場大嘅走勢。