櫻花殘陣鹿角添食在望

猪拉多纳

日本聯賽盃八強首回合賽事展開，鹿島鹿角主場迎戰大阪櫻花，櫻花先失去兩個中場主力，再有兩件參戰奧運缺陣，中場線面目全非，戰鬥力隨時得番五成，今次仲要對住剋星鹿角，凶多吉少，熱捧主勝！

（周三晚6時開賽、馬會網上文字直播）

大阪櫻花今夏先有日本新進中場清武弘嗣轉戰德甲，跟手輪到南韓國腳金甫炅加盟卡迪夫城，盡失兩臂，去到奧運來臨之時，中場小將山口螢及扇原貴宏都要代表日本出戰，今次中場突然冇咗四位主力，相當難搞！再者，櫻花近期畀鹿角食住，對上五次碰頭一場不漏輸晒，殘陣曳績，唔反仲等幾時！
FC東京唔齊腳捧對家

同日仙台維加泰主場對FC東京，受到奧運影響，東京缺少多位後防主力，包括門神權田修一及守將德永悠平，後衞森重真人亦有傷，人手短缺，仲要正值作客五連敗，好難頂得住維加泰，要主勝！