英國起「細」撳烏圭

猪拉多纳

奧運男子足球A組生死戰！由於同組塞內加爾面對篤定出局嘅阿聯酋，要贏波全取3分唔難，所以今場英國對烏拉圭好大機會「兩隊只能活一隊」。鑑於英國呢場和波都達標，而烏拉圭嘅入球能力又令人失望，「四眼哥」決定一反常態，推介1.65倍入球細！

（有線18、63及203周四凌晨2:45直播）

「四眼哥」一向係大盤客，堅持住買咗大一日未完場，都有機會中嘅賭波信念。但睇咗英國同烏拉圭頭兩輪嘅表現之後，今場決定理性番一次捨大取細。點解連賭波信念都可以掟埋一邊？無他嘅！首先英國賽前以較佳得失球，騎住同樣兩戰得4分嘅塞內加爾居首，今場喺卡迪夫球場對住兩戰得3分嘅烏拉圭，只要保持不敗就夠分出線。喺和波都掂嘅大前提下，「四眼哥」相信一直畀人批評戰術保守嘅領隊皮雅斯，今場會變本加厲、更加保守。
傑斯承諾同蘇亞雷斯握手

二嚟賽前講到天花龍鳳嘅烏拉圭，開賽後演出完全唔對路，兩件大牌蘇亞雷斯同卡雲尼，唔知係睇班後生仔隊友唔起，定係未放夠假唔想踢，一啲貨都交唔到。上場對住打少個嘅塞內加爾連蛋都破唔到，如果唔係第一場反勝阿聯酋，今場連胡都冇得叫喇！

何況喺上季英超因被指向曼聯黑人後衞艾拉種族歧視，而鬧得滿城風雨嘅蘇亞雷斯，今場面對米卡李察士、哥爾卡同蘇杜爾等黑人對手，就算賽前英國隊長傑斯講到明開賽前會同佢握手示好，睇怕都好難甩到身，想入波肯定比頭兩場更難。一隊全心去守、一隊冇力去攻，咁嘅組合想唔捧細都唔得啦！

奧運男足A組
奧運男足賽制

16支球隊分4組進行單循環賽，每組首、次名躋身8強淘汰賽。