撐恩高斯達特x哈化柏林

猪拉多纳

「四眼哥」今日膽粗粗踩過界，喺一位前輩指路下，同大家傾吓今晚開鑼嘅德乙。喺現今足球世界都係金錢掛帥下，決定強捧兩支「有貨」球隊恩高斯達特同埋哈化柏林，二串一W夠做！
兩軍狂揼錢買人

先講恩高斯達特，呢隊可以話係今季德乙嘅暴發戶，喺得到拜仁主要贊助商奧迪車廠支持下，季前喺轉會市場做咗狙擊手，睇啱就買，一口氣簽入哈化柏林中堅安德列米積杜域、法蘭克福中場哥克馬斯，同埋紐倫堡射得之人艾格拿。多咗呢幾個擁有德甲經驗嘅球員，配合本身都唔曳嘅班底，力足成為今季升班熱門之一。今仗主場迎戰錢字行先、季前賣得就賣，連陣中被譽為天才嘅新星貝頓確特都賣走埋嘅科特布斯，贏波零阻力。

至於另一疊水球會哈化柏林，季前買人都唔手軟，羅致咗緬恩斯鋒將艾拉基，同埋不來梅前鋒辛度華拿等等，加埋留隊嘅哥倫比亞國腳阿祖安拉莫斯，一般等閒貨色嘅防線根本難以招架。上季柏達邦演出可人，可惜最終衝德甲失敗，換來陣中主將畀列強採購，實力大打折扣下，開鑼戰可能即做炮灰喇！