射手對決！PSG搵巴塞做大騷

猪拉多纳

今晚除咗有奧運男足，仲有巴黎聖日耳門（PSG）喺主場鬥巴塞隆拿嘅熱身賽！大事擴軍嘅PSG雖難與巴塞相提並論，但係有伊巴謙莫域領導嘅鋒線同球王美斯硬撼，一於捧1.68倍入球大啦！（now632台周日凌晨1:45直播）

法甲財主PSG早排用「銀彈攻勢」增添咗伊巴謙莫域、堤亞高施華、拿維斯3名猛將，以人腳嚟計絕對勁過唔少歐洲豪門，但堤亞高施華仲未打完奧運，班波根本未有時間磨合，踢過「地上最強」嘅伊巴謙莫域都深明此道，特別喺賽前為隊友減壓：「現階段嘅聖日耳門同巴塞根本冇得比，想好似佢哋咁勁嘅話，仲要做多好多嘢。」
伊巴謙莫域倒戈美斯

不過巴塞嘅後防的確存在隱憂，艾迪安奴及佩奧爾因傷缺陣，新兵佐迪艾巴打完奧運之後就仲放緊假，PSG今鋪未必食蛋o架！不過最重要嘅係難得美斯今年唔使踢國際賽，抖夠本之後上場熱身賽對拉加競技就大演帽子戲法，雖然話對手係弱旅，但係都證明「球王」已經叉足電，今場佢同舊隊友伊巴謙莫域大鬥法，大家又使乜擔心冇波入先？