英國強陣勢擒太極虎

猪拉多纳

男奧足兩大熱門今晚分途出擊，力爭史上首面足球金牌嘅巴西，憑超班實力要大炒洪都拉斯冇難度，1.5倍「讓球主勝」夠穩（有線18、63及203周日凌晨0:00直播）；次熱東道主英國則有傑斯復出，勢擒冇牙太極虎，2.05倍主W要捧。（有線18、63及203周日凌晨2:30直播）
巴西3子回歸鑊氣夠

「森巴兵團」實力超班，喺分組賽3戰全勝，佢哋上仗收起前鋒侯克、柏圖同奧斯卡杜斯山度士等主力，依然照炒新西蘭，今仗3子回歸正選，就算守將阿歷士辛度坐波監，都一樣夠殺！洪都拉斯呢邊，主帥費蘭度蘇亞雷斯據聞今戰轉打5人中場線，臨時轉陣式未必適應到，隨時輸得更大鑊。

另邊廂，英國喺A組3戰得2勝1和首名出線，表現討好。上仗因傷休戰嘅中場發電機傑斯，抖一抖回氣踢番正選，可望有更好發揮，配合比拿美同史杜列治組成嘅進攻鐵三角，唔難搵到食。對手南韓喺B組雖然3戰不敗，但其實有2場冇波入，實力唔見突出，即使強陣出擊，對住略高一線嘅東道主英國，睇怕都係凶多吉少。