三神正氣無懼闖漩渦

猪拉多纳

日乙榜首形勢現時七國咁亂，頭七位只有四分之距，鬥得好激！第五位大分三神狀態Keep住，作客鬼死咁硬淨，今次造訪中游分子德島漩渦有得受讓，個盤鬼鬼哋，不過，三神今季好正氣，照捧下盤！（周日下午5時30分開賽）
三平和司一個頂兩個

大分三神近期愈踢愈好，對上九戰只輸一場，嗰場對手湘南比馬同樣當弗，輸都冇計！單計作客戰績，三神連贏四場，四仗加埋失一粒，攻守都掂，狀態大勇，今場對手德島漩渦位列中游，近四次主場出戰只贏得一次，憑乜讓三神先？

就因為三神主力前鋒森島康仁要停賽？家陣你當三平和司死嘅咩！呢位哥仔同樣有質有態，一個頂兩個，三神僅落後榜首甲府風林兩分，贏波分分鐘上到榜首，唔信佢哋會Hea踢囉，結合球隊近六次對漩渦未嘗一敗，唔怕鬼，要下盤！

睇多場下游對決，FC岐阜主場對福岡黃蜂，呢場如假包換海軍鬥水兵，黃蜂曾幾何時被視為升班熱門分子，可惜班友唔爭氣，依家淪落到身處下游，抵死！兩支弱旅對戰，唔慌精彩，雙方近八次碰頭全細，追多口細！