日本醒晒神嗒「美」人

猪拉多纳

倫奧女足決賽由美國女足對日本女足，勁爆上演女子世盃決賽翻版戰！雖然美國有射手雲芭芝連續5場入波，但創造歷史入決賽嘅日本女足得到足協保證，回程同男足睇齊升呢坐商務客位凱旋回國，主將澤穗希仲講明要親自入波打沉對手，士氣大振捧1.83倍「讓球客勝」！（有線18、63及203周五凌晨2:45直播）

「美女」晉級過程中5戰入14球，火力勁猛，但唔好忘記，連續5場入波嘅王牌雲芭芝已32歲，司職中堅嘅隊長拉姆邦妮更37歲，再遇體力無限嘅日本女足好蝕章。講到底，上年女子世盃美國喺決賽同日本加時踢成2:2後互射12碼輸波，對上3屆奧運入決賽，90分鐘計未贏過，呢場讓波真係要唔過！
全民力撐 澤穗希豪言入波

「粉紅兵團」冇對手咁有霸氣，不過前鋒大儀見優季連續兩場入波，可以話係及時雨，教頭佐佐木則夫更大爆，日本足協承諾唔會再大細超，女足返國唔使坐經濟客位，會同男足睇齊享用商務客位頂級服務，更何況歷史上冇女足球隊連贏世盃同奧運冠軍，咁嘅環境唔搏點得？

仲有呀，日本女足主將澤穗希上場賽後含住眼淚話，自己係第4次出戰奧運，依家距離夢想只差1場比賽，諗住儲夠氣喺決賽親自開齋入波搶個金牌返嚟。最重要係，現時日本女足得到全民力撐，4強對法國女足關東地區最高收視達到不可思議嘅40.1%，呢場對住防線嚴重不穩嘅美國女足，澤穗希隨時又做女英雄！
美國近屆決賽90分鐘不勝

年份 賽果

2008 巴西女足 0:1 美國女足*

2004 美國女足 2:1 巴西女足*

2000 挪威女足 3:2 美國女足*

1996 中國女足 1:2 美國女足

*為加時後賽果
賽制：

決賽及季軍戰以一場過分勝負，若法定時間內打成平手，需加時作賽，再和則互射12碼決勝。