法甲Kick Off撐蒙彼利埃開W

猪拉多纳

法甲正式開咧，上季冠軍蒙彼利埃亦展開衞冕之旅！今晚佢哋會喺主場迎戰上季第8嘅圖盧茲，雖然今場陣容唔多完整，但小妹相信佢哋可以旗開得勝，一於捧1.67倍主勝啦！（開賽時間：周六凌晨2:45）
圖盧茲8場熱身賽得3勝

蒙彼利埃上季喺轉會市場只係使咗200萬歐元，就成功奪得法甲冠軍，今季一於繼續執平貨路線，賣走咗神射手基奧特後，再以低價購入阿根廷前鋒艾曼紐靴里拉同法乙昂熱嘅查邦尼亞。論名氣，當然同聖日耳門嘅伊巴謙莫域差好遠啦，但艾曼紐靴里拉已經喺法冠盃開齋，表現搶鏡，難怪佢哋個寸爆會長歷高連都話：「不嬲都唔覺伊巴謙勁喎！」

不過小妹就唔太睇好蒙彼利埃今場可以大勝對手喇，皆因佢哋雖然由對手圖盧茲撬得後防靈魂干基，但中場主將貝漢達同新加盟嘅莫尼亞因傷缺陣，加埋伊斯查達要停賽，攻勢未必好似之前咁流暢，就算對住8場季前熱身賽得3勝嘅圖盧茲，都係穩陣啲博個W算啦！