意大利新人試陣唔夠揪

猪拉多纳

歐國盃玩完只係個半月，今晚就有場歐國盃8強復仇戰，英格蘭移師瑞士伯爾尼再戰意大利。意軍主帥柏蘭迪利今次為未來發展挑選9名新人入伍，試陣味極濃，想搵個孭到飛都冇，反觀三獅兵雖然都畀唔少主力休息，但大軍陣容依然唔曳，整體實力秤先，安高決定捧2.45倍主W。（開賽時間：周四凌晨3:00）
巴洛迪利患結膜炎退隊

當日8強戰英格蘭同意大利踢足120分鐘互交白卷，到互射12碼就由藍衫軍取勝。但正所謂今時唔同往日，意軍主帥柏蘭迪利今次點兵22人中有8個係新人，去咗北京踢意超盃嘅祖雲達斯同拿玻里國腳如保方同馬治奧等都冇揀。更陰功嘅係，前日再有射手巴洛迪利因患上結膜炎退隊，要補入第9件新兵迪亞高法比尼，家陣成隊波孭到飛就只得阿古蘭尼同迪羅斯幾個，真係信唔過o架！

另邊廂嘅英格蘭，領隊鶴臣只保留10個歐國盃國腳，包括朗尼、泰利等都獲得免役，但查實成個陣容只得3個新兵，其餘包括卡域克、林柏特同迪科爾等都獲重召，實力都有番咁上下，就算佢哋有前鋒史杜列治、中場阿歷士張伯倫同門將赫特退隊，點計都仲夠殺，有力小勝。