基恩回歸加納搵國足攞威

猪拉多纳

歐洲各大聯賽開咧前先踢一輪國際熱身賽，今晚中國都會喺西安會師非洲勁旅加納，國足早前雖有小敗予西班牙嘅佳績支持，但係對住有基恩復出嘅「黑珍珠」，實力始終有距離，都係捧2.15倍客W。（中央5台周三晚7:35直播）
中國新丁朱挺打右閘

國足今次有7個恒大球員入選，重點當然係由孫祥同馮瀟霆組成嘅防線啦！可惜正選右閘張琳芃有傷在身，消息指可能會由新丁朱挺補上，加上只得郜林稱得上係正箭頭，面對無論實力定身體質素都高一籌嘅加納，未必拎到咩甜頭，難怪主帥甘馬曹都話只當係一次鍛煉同學習嘅機會啦。

「黑珍珠」加納近年喺國際賽屢屢有出色表現，今次造訪中國，陣容都相當有誠意o架！除咗有隊長蒙達利之外，早前宣布無限期退出國家隊嘅基恩亦都宣布重出江湖，佢似乎終於擺脫年初喺非國盃4強戰射失12碼嘅陰霾，今次強勢回歸，分分鐘拎國足嚟出氣添！