全「廠」平起平坐一條心

猪拉多纳

倫敦奧運剛閉幕，英超跟手馬上開鑼，奧運嘅激情仲籠罩住英國，尤其係倫敦嘅球會要食住個勢上，而且阿仙奴喺季前備戰空前積極，整定新特蘭冇運行！

「7年之癢」好難頂，7年冇冠仲難捱！阿仙奴冇得再保守，賣走咗個心已經唔喺度嘅尹佩斯，再擸咗3件實而不華嘅新炮兵，對一向講求整體合作兼快速行軍嘅「兵工廠」嚟講，板櫈深度加強，球員平起平坐，毋須郁吓都要睇尹佩斯眉頭眼額，一條心自然效果理想。
新助教保迪有料到

上個禮拜講奧運嗰陣成日提到，一個金牌運動員嘅背後有一支強而有力嘅團隊做咗好多嘢，呢季英超要留意阿仙奴嘅新助教保迪。呢位前炮兵好擅長運動心理學，同球員玩得埋，尤其踢後衞出身，對防守部署好有心得，難怪自從有咗保迪之後，雲格嘅皺紋都好似少咗幾條，佢花咁多心思就係要對新特蘭打響頭炮！