巴塞雙閘齊飛 玩殘皇蘇

猪拉多纳

巴塞隆拿上季表現患得患失，結果連失聯賽同歐聯慘變「雙失最強」，今季當然要爭番啖氣啦！雖然換上新帥領軍，但主力班底基本上冇變過，今晚頭炮喺主場對熱身賽成績麻麻嘅皇家蘇斯達，有力大炒打響頭炮，讓2球都照捧1.63倍「讓主」！

（now100、630及632台周一凌晨3:00直播）
皇蘇熱身賽表現麻麻

巴塞正式踏入「維帥年代」，呢位少帥嘅真功夫仍有待觀察，不過隊波繼續以沙維、恩尼斯達同布斯基斯做中場鐵三角，喺熱身賽對住巴黎聖日耳門、曼聯等勁旅，控制戰局能力有增無減。西班牙《體育報》仲爆料，話維蘭路華今季會畀喺歐國盃踢到曉飛嘅「小白」擔當創造者角色，可以預期會有大量華麗攻勢。

「地上最強」右閘丹尼爾不嬲係半閘半翼，令球隊防線可隨時「4變3」，今季有埋佐迪艾巴呢位擅於進攻嘅左閘，絕對可以做到「雙閘齊飛」，令進攻變得更立體，睇怕近6場熱身賽得3勝3負嘅皇蘇，今晚都會係首支畀呢套戰術蹂躪嘅受害者！