福岡主「勝」氹贊助商續約

猪拉多纳

拎得贊助就梗要交貨，福岡黃蜂今晚喺日乙主場對富山勝利，唔止要為氹球迷開心，仲要威畀近日簽約合作嘅「西鉄Group」高層睇，事關福岡嘅波衫廣告贊助合約出年1月就屆滿，為咗有得繼續玩，當然要全力打沉富山至得，捧1.76倍主W啦！（開賽時間：周三晚6:00）
富山包尾前鋒打柴

福岡降班後冇咩好戲做過，近7場聯賽更加得1勝6負，但即使係咁，日前佢哋終於搵到新贊助商，呢場波衫會印埋新廣告登場，之不過合作到出年1月31號結束，而且福岡波衫4個廣告位，背脊仲未有着落，為咗氹新贊助商同搵老細，主場當然要威番次。

雖然福岡有唔少傷兵，但富山更閉翳，經過連續13場聯賽不勝得6和7負，終於撻埋落包尾位置，前鋒朝日大輔同山瀨幸宏最近又傷埋，士氣曳唔在講，高層新簽嘅鳥棲砂岩中場國吉貴博質素有限，即使射手黑部光昭好番，做完兩場後備上場踢番正選，都唔似做到救世主。