利雲特「燒鵝」鬥志 頂得住華拉度列

猪拉多纳

利雲特上季以蔗渣價錢踢出燒鵝味道，上場出戰首場歐霸盃更旗開得勝，士氣大振！今晚佢哋喺聯賽作客重返西甲嘅華拉度列，雖然有主力受傷，不過憑住無比鬥心有力保住不敗，一於捧1.83倍「讓客」啦！（now632台周二凌晨2:00直播）
華拉度列葡萄牙中堅回歸

利雲特上季初曾經創下7連勝佳績，仲喺自己地頭贏過皇馬添！但係今時唔同往日，沙維托利斯、干尼等主力已經離隊，仲冇乜補充過強援，今季要重演奇迹真係難啲。好彩佢哋上周中喺球會史上首場歐洲賽中作客馬特維爾淨勝2球，信心大增，教練桑馬天尼斯仲叫班波今場千祈唔可以輕敵，相信佢哋收到「柯打」都會畀心機，將好表現延續到聯賽。

不過小妹就唔敢直取客勝喇，畢竟利雲特有中場卡拉比拿斯受傷要抖成個月，對整體組織力影響唔細。加上喺開咧戰獲勝嘅華拉度列不單有主場之利，又有曾經短暫効力半季嘅葡萄牙中堅軒歷基沙蘭奴，由波圖重新來投，執靚個後防唔係咁易畀人咬得入，都係捧利雲特個「客勝」穩陣啲。