發電孖寶復出鬥牛兵大炒「格」

猪拉多纳

球壇霸主西班牙爭取衞冕世界盃嘅第一擊，喺歐洲區外圍賽I組出訪三流球隊格魯吉亞，應該唔難大勝一場打開勝利之門。「狂牛兵團」上周熱身賽收起沙維同恩尼斯達一對「發電」孖寶做後備，擺明留力今晚，加上射手韋拿復出開齋士氣好，今晚實食冇黐牙，1.53倍「讓球客勝」要捧！

（中央5台周三凌晨1:30直播）
格魯吉亞弱雞 領隊最出名

「狂牛兵團」領隊迪保斯基對今戰絕對信心十足，點兵夠膽連桑馬達、洛蘭迪同查維馬天尼斯幾個歐國盃冠軍成員都唔揀，畀佢哋留喺球會提升狀態，根本完全冇放格魯吉亞在眼內，佢仲對班球員講：「想去巴西？就由今場贏波開始」。事實上，佢哋上周五大炒沙特阿拉伯5蛋場波都係半力出擊，唔只沙維同「小白」，其實就連卡斯拿斯同沙治奧拉莫斯都只係後備登場，球員留晒力等今晚強陣出擊，要贏幾多都得啦！

再者，前線除咗有愈嚟愈Fit嘅費托同柏度洛迪古斯外，斷腳長抖超過8個月嘅韋拿，上周亦踢咗復出後首場國家隊比賽兼射入12碼添！

睇番格魯吉亞，最出名應該係佢哋個光頭佬領隊、前紐卡素中場基斯巴亞，但陣內球員根本冇個係歐洲一線，今晚對住連贏3個國際大賽嘅西班牙，輸少當贏啦！

歐洲區 I 組