4串1小注賀中秋

猪拉多纳

今晚中秋佳節，人月兩團圓，假期過後又有歐聯，喺一片歡樂氣氛之中，慎防勁旅歐聯前留力，因此今日實在不宜重注，最多都係小賭怡情，咁就唔需要成日掛住賽果。想賭錢，星期一仲有賽馬，今日用多啲時間同家人歡度佳節。Peter簡單推介一條由四支非歐聯球隊組成嘅4串1，小注刀仔鋸大樹。
維拉信心返晒嚟

頭關英超阿士東維拉主場對西布朗，平手盤要主隊。維拉開季脫腳，幸好近期已開始上力。上仗英聯盃踢出代表作，作客淘汰「億萬大軍」曼城，肯定可以振奮士氣，加上佢哋主場兩連勝，佔地利贏面大。尤其係西布朗有跌Watt迹象，平手盤維拉相當着數。

另外三場都係要主勝，意甲拉素主場對錫耶納，雖然錫耶納取得兩連勝，但呢類意甲細球會好蠱惑，當外界開始睇好佢哋時，好可能又打回原形。拉素人腳質素佳，主場水準穩定，應可全取三分。西甲奧沙辛拿主場對利雲特，無可否認利軍近況較佳，但留意佢哋靠主場搶分，作客冇料到，難怪客W冷到3.6倍，反而奧沙辛拿排包尾，但主W熱僅有1.9倍，信盤口要主勝。

最後里昂主場對波爾多，里昂今季冇得踢歐聯，應會全力爭聯賽錦標，球隊狀態亦勇銳，開季後主場四戰全勝，主W1.87倍抵玩。

金句：中秋佳節，小賭怡情