乾貴士閃耀法蘭克福

猪拉多纳

今季德甲升班馬頂瓜瓜，杜塞爾多夫頭五仗聯賽保持不失，跟住主場喺不利情況下逼和史浩克04保持不敗。今晚登場嘅法蘭克福更加犀利，除咗讓球盤路全勝之外，更以場上嘅精彩表現留住球迷嘅心，尤其是乾貴士光芒四射，比昔日嘅香川真司有過之而無不及。今晚法蘭克福再次主場出戰，對手只係弗賴堡，3分絕對係手到拿來。

（有線61及201台周日晚9時30分直播）

原本以為法蘭克福季初對手較弱，先造就如此佳績，面對有實力球隊終會長路有盡時！但佢哋上周中主場撼多蒙特相當經典，喺劣勢下逼和多蒙特3比3，若然畀多10分鐘佢哋踢，隨時贏埋都唔奇。
神奇升班馬值得再追

五場聯賽射入十四球嘅法蘭克福攻力可人，當然歸功於日本球員乾貴士。呢位日本國腳雖然上季已經去咗波琴搵食，但今季先正式喺德甲亮相，但完全冇唔適應，而且扭得又射得。佢作為攻擊中場更為隊友穿針引線，令奧斯恩、美亞、賀化等隊友踢得更有神采，組成一條強勁攻擊鋒線。

至於對手弗賴堡開季表現一如所料浮浮沉沉，作客情況下遇上狀態大勇嘅法蘭克福，相信都係以和為貴，但小妹就唔相信佢哋能夠抵擋住對手攻勢，奧利華包文應該都要喺龍門執幾次波出嚟啦！