皇馬大捷慶團圓

猪拉多纳

連贏3場嘅皇馬，今晚喺西甲對住實力低幾班嘅拉科，有權炒起對手！可能皇馬都想應下節喇，佢哋早幾日終於平息內亂慶團圓，趁住中秋佳節憑較佳質素同主場4連勝氣勢，即使足智彩開盤辣到皇馬讓2球，都照捧1.93倍「讓球主勝」！（now632台周一凌晨1:50直播）
基迪拉或取代艾辛踢正選

中秋佳節除咗要人月兩團圓，最緊要係一家人齊齊整整平安過節。皇馬早排內訌不絕，C朗扭計、葡萄牙幫又話同西班牙幫唔啱，不過近排所有麻煩嘢都已經解決，皇馬高層仲積極研究點樣滿足C朗要求，曾經被主帥莫連奴打入冷宮嘅西班牙幫大佬沙治奧拉莫斯，上仗對華歷簡奴都復任正選，家和自然萬事興啦！

事實上，喺西甲頭4輪僅得4分嘅「銀河艦隊」，近排表現的確回勇，喺歐聯反勝曼城大振士氣，到上輪西甲佢哋未受賽事延期影響，作客輕鬆贏華歷簡奴2粒，之後再喺巴拿貝盃狂炒哥倫比亞勁旅米倫拿列奧8球，副偈撻番着，試問拉科又點頂吖？最重要係德國中場基迪拉今戰或會取代未練到最弗嘅艾辛踢正選，攻守肯定更加平衡，至於「雪櫃兵」卡卡都重拾射門鞋，喺熱身賽連中三元隨時候命，今晚使驚冇波入咩？
拉科近6次訪巴拿貝輸晒

季初4戰保持不敗嘅拉科，查實4戰只得1勝3和唔突出，要知道當時對手除咗華倫，其餘都唔係頂級勁旅。到上輪聯賽，拉科主場對住二線頭嘅西維爾，結果主場淨吞2蛋，實力擺明未夠班。

仲有，佢哋歷來造訪巴拿貝例冇運行，多年來只係贏過2場咁大把，近6次作客更錄得全敗添！考慮埋拉科今仗有中堅艾泰美養傷，防線執位，今鋪想輸少球都難啦！
拉科踢西甲冇料到

‧皇馬近6次主場對拉科全勝。

‧自開鑼戰計所有主場賽事，皇馬5場波共入17球。

‧拉科上季西乙21場作客贏11仗、入29球，但前季西甲作客則只係贏得2場、入9球。
博6.2倍主其他

皇馬今季出閘脫腳，依家喺西甲已經落後榜首巴塞8分，之不過皇馬輸嗰2場都係作客波，其餘4仗坐鎮巴拿貝都贏晒對手，相反拉科早兩年降班嗰季嘅作客贏得2場、入得嗰9球，就算上季喺西乙嘅客戰成績亦唔算突出，今戰造訪皇馬隨時畀人炒鑊「999千足純金」，「主其他」波膽有6.2倍，博得過o架。