馬略卡受讓「基」不可失

猪拉多纳

今晚西甲獨腳戲，基達菲主場迎擊馬略卡，後者一向畀人嘅印象係主強客弱，離開主場就例必腳軟。不過，喺主帥卡柏路斯帶領下，呢支「小島球隊」嘅作客病逐漸痊愈，對住近況大不如前嘅基達菲，有力全身而退，「讓球客勝」值得捧場。

（now 632周二凌晨3時30分直播）
重整後防線硬淨

自上季季中接手馬略卡後，鐵帥卡柏路斯為球隊注入硬朗球風，無論係打法定係心理質素都有明顯提升。今季流失多名主將，卡帥喺限米煮限飯下銳意重組防線，引入前馬體會隊長安東尼奧盧比斯、前科隆隊長柏度基洛美同巴西中堅安達臣干斯卡奧，新組合活力與經驗俱備，防守方面畀到人信心。

前線方面仍靠希密特同域陀食胡，前者今季已入4球，連新加盟嘅長人中鋒艾里斯文迪上仗都開埋齋，墨西哥國腳杜斯山度士亦告傷愈復出，攻力同創造力都大增，佢哋開季5仗不敗絕非偶然。
基達菲信心急跌

基達菲季初曾勇挫皇馬，而摩洛哥小將巴拉達持續有貨交，可惜佢獨力難支，一輪虛火後球隊戰績已見下滑，聯賽2連敗後信心大跌，今仗更有中堅阿歷西斯停賽，令原本不穩嘅防線更加危危乎，面對硬淨嘅馬略卡，實在讓唔起對手，「讓球客勝」信得過。