紅魔大難臨頭

猪拉多纳

歐聯上演第二輪分組賽，H組羅馬尼亞克盧日主場硬撼曼聯，紅魔鬼啱啱喺聯賽畀熱刺打斷六連勝走勢，現時面對後防傷兵問題，作客可勝不穩。經過上屆分組賽提早畢業後，曼聯唔敢輕敵，今次勢將派出尹佩斯及朗尼等以攻代守，入波唔會少，捧大盤！

（有線64及204台周三凌晨2時45分直播）
防線殘缺信唔過

曼聯上場聯賽對熱刺暴露防線中路弱點，現時中堅菲爾鍾斯、基斯史摩寧及尼曼查維迪受傷休戰，里奧費迪南速度不足，畀人放到斷氣咁滯，莊尼伊雲斯唔多頂得，制空力不足，同樣信唔過！紅魔鬼今季表現慢熱，聯賽六戰有五場先失守，由於後防唔齊腳，主帥費格遜冇乜可以做，只能求神拜佛希望班友生性頂得住。

紅魔鬼後防天殘地缺，前線卻有人滿之患，射手朗尼已經傷愈，上場後備落場表現生猛，成功連繫中場同前線，今次有機會拍住尹佩斯喺前線攻堅，兩大巨星再次同場搏殺，確實令人期待。大家唔好忘記球隊仲有兩個後備殺手韋碧克同查維亞靴南迪斯，調動空間好大，既然後防不穩，不如索性主動搶攻爭勝囉！
克盧日屢有驚喜

羅馬尼亞最出名係吸血殭屍，該國代表克盧日今屆於歐聯就化身吸血鬼，先於外圍賽淘汰上屆打殘曼聯嘅巴素利，分組賽首戰作客布拉加亦爆冷贏2比0，反映球隊戰鬥力唔弱，大軍有唔少巴西同葡萄牙球員，普遍波底唔錯，進攻有紋有路，其中巴西兵拉菲爾巴斯圖斯上場梅開二度成為贏波功臣，勢成紅魔鬼心腹大患，加埋希臘中鋒卡比達路斯喺前線爆破，贏唔贏唔敢講，但絕對有條件爭取士哥，玩大盤啦！
歐洲盤有冷味

馬會足智彩開出曼聯客W熱至僅1.5倍，但睇番歐洲主要莊家，紅魔鬼贏波賠率都超過1.6倍，英國威廉希爾更開出1.65倍，似乎對曼聯有保留。相比之下，歐洲開出嘅克盧日主W回報，比足智彩為低，當中188bet僅得4.7倍，同足智彩相差甚大。