全勝拜仁近乎完美

猪拉多纳

今晚八場歐聯分組賽，Peter傾向睇好客軍，尤其是拜仁慕尼黑作客巴迪，實食冇黐牙。今季拜仁可以用近乎完美來形容，球員鬥志高、後備力量強、教練戰術超卓，4231陣式好機動，攻守兼備。德甲冠軍寶座基本上已成拜仁囊中物，問鼎歐聯冠軍前景，亦好樂觀。

拜仁今季踢各項賽事，仍然保持全勝，絕非僥幸，球隊人腳非常充裕，每個位置都有高質素後備，對三線爭標好重要。內部競爭大，球員比賽自然要搏命。教練軒歷基斯嘅戰術部署之高明，可以位列歐洲頭五位，Peter好欣賞佢哋4231陣式夠機動，舒韋恩史迪加雖然係防守中場，但球隊進攻時，佢亦可後上埋門，令球隊有五位攻擊好手，同時向對手施襲。
歐聯三分志在必得

拜仁新簽嘅巴西中堅丹迪亦比球隊以前其他中堅更靈活，大大減輕門將紐亞嘅壓力。Peter認為拜仁今季起碼可以獲得兩項冠軍，德甲可以話係袋梗，捧德國盃機會亦高。當然會方更加想再嘗歐聯盟主滋味，一定會認真踢好每場歐聯，對今場三分志在必得。

拜仁客W1.26倍乏味，可用作過關，串埋另一場歐聯薩克達下盤。呢支烏克蘭球隊藏龍伏虎，唔可以睇小，今仗作客祖雲達斯，受讓半一，下盤相當抵玩。
金句：季初四平八穩，誓掹拜仁車邊