多蒙特阿積士大逃亡

猪拉多纳

歐聯「死亡D組」再度登場，兩大惡霸曼城及皇家馬德里分途出擊，曼城主場對多蒙特，皇馬作客阿積士。曼、皇兩軍今輪殺氣勁，事關多蒙特踢歐聯一向唔掂，上屆分組賽三戰作客全敗兼開大，面對主場極惡嘅曼城實冇運行；而阿積士一向係皇馬私房菜，近兩屆交手四戰全敗，今晚實行同多蒙特一齊「大」逃亡！
曼城多蒙特有前無後

曼城主場同多蒙特鬥入波！「藍月亮」後防曳到震，開咧九仗場場失波，主帥文仙尼𢱑爆頭都冇計止血；防線靠唔住自然要入多兩粒，弗爆阿古路、泰維斯交到貨，難怪頻頻開大！多蒙特去屆分組賽三場作客全開大盤，咁啱key，大盤點會唔encore？

（有線61及201台周四凌晨2時45分直播）

近期睇親曼城直播，文仙尼都口黑面黑，當然係不滿後防慌失失。由社區盾鬥車路士開始，曼城無論英超、英聯盃抑或歐聯，次次都失波，對住皇馬「恐怖鋒線」都算，連對富咸同阿士東維拉都未能保住清白之身。文帥未能改善後防不擅應付死球弱點，只能換人賭賭運氣，中堅尼史葛已被貶後備，但用新仔拿斯達錫，睇嚟都唔好得幾多。
多蒙特上屆作客全大

後防曳成咁，前鋒自然要畀多兩錢肉緊。曼城勝在射手多，就算阿古路、泰維斯唔掂，後備都仲有迪斯高同巴洛迪利。球隊近31場主場賽事，僅得一場冇波入；今戰又係一眾「士哥拿」show time。

多蒙特一向以攻力見長，走咗香川真司，但新將馬高列奧斯仲醒，本季聯賽已入四粒成首席射手，上仗德甲大炒慕遜加柏仲梅開二度。事實上，「蜜蜂兵團」不嬲打開放足球，近18場正式賽事場場有波入，其中14場開大；而上屆分組賽三場作客比賽，亦全數開出大盤，值得追捧。