慕遜加柏露底灰姑娘

猪拉多纳

上周中德甲球隊喺歐聯就冇乜運行，多蒙特同史浩克臨尾被對手逼和，拜仁仲衰到輸埋，至於慕遜加柏繼續延續劣勢，歐霸盃主場出戰竟然大敗畀費倫巴治，今晚佢哋繼續喺主場出擊，但面對今季超級大勇嘅法蘭克福，慕遜加柏讓波，冇理由唔支持下盤。（有線61台周日晚9時30分直播）
「法福」超級弗爆

今季唔係第一次推介法蘭克福，但實在又欲罷不能，佢哋上個月受讓3次，3個盤全勝，本以為佢哋對住強隊多蒙特會打回原形，點知愈戰愈勇仲搞到「蜜蜂仔」焦頭爛額！法蘭克福陣中前線個個弗，尤其係上屆德乙神射手美亞，上周追平弗賴堡個入波仲被評為金球。要提法蘭克福，點可以唔提奧斯恩同乾貴士，佢哋絕對係法蘭克福爆出嘅功臣。

上季慕遜加柏踢半年好波，繼續hea踢至今，慕遜加柏就好似灰姑娘過咗凌晨零時一樣，打回原形，尤其是今季要應付埋歐洲賽，實在吃力不討好。

上周慕遜加柏作客多蒙特被炒，更被馬高列奧斯倒戈入波，成班波已經散晒，慕遜加柏想用盧克迪莊取代馬高列奧斯，呢個算盤又打錯晒，搞到慕遜加柏攻力減半，成個9月一場波都未贏過，士氣低沉。論休息時間又唔夠客軍充裕，今晚一於再撐多次法蘭克福。