保加利亞靠地利 丹麥前線缺創造性

猪拉多纳

又到踢太公波嘅時間喇，有啲球星身嬌肉貴會就住踢，有啲就要把握機會爭取表現博「升呢」，更何況保加利亞喺世盃外歐洲區B組有好開始，梗係要喺自己地頭狂砌近況麻麻嘅丹麥。

好嘅開始等於成功嘅一半，保加利亞受益於賽程安排，喺分組前5輪比賽中，有4輪都喺主場作戰，換言之，有冇機會突圍而出，一早就喺主場定生死。結合新舊兩代嘅保加利亞，頭兩輪主場搶到4分，包括喺落後劣勢下逼和意大利，至於險勝亞美尼亞，更出現3紅10黃，踢到飛沙劈石，可見佢哋喺自己地頭毫無保留，既然戰意鮮明咁激情，值得撐多次保加利亞！

相對嚟講，丹麥名氣雖勁過主隊，但近況唔及對手，上場悶和捷克一役睇到攻勢欠缺創造性，尤其係冇咗高速嘅翼鋒，好難製造有威脅嘅助攻，相信丹麥今仗續會陷於苦戰。