哨牙蘇浮誇犯大忌

猪拉多纳

謝拉特一直係利物浦風頭躉，但今季「神奇隊長」嘅風頭，畀蘇亞雷斯完全蓋過。「哨牙蘇」既好波腳風又順，但最近圍繞佢嘅都係負面新聞，呢期無論球員、球證甚至國際足協高層，都企出來話佢插水無恥。

講技術，「哨牙蘇」的確係犀利，而且好有鬥心比賽，今季紅軍入波靠晒佢，蘇亞雷斯場場都搏晒老命。不過可能係入波心切，佢周時於禁區稍稍被掂到，就即刻跌低，仲撳住隻腳大叫，呢個情景場場都見幾次，的確係令人討厭。球證對「哨牙蘇」被侵犯嘅「五五波」，肯定唔畀12碼；有時連「XX波」都唔會吹雞。
利物浦雷丁鬥轟

畀着我係利物浦領隊羅渣士，肯定會叫佢唔好再咁易跌，個波有得去就應該去埋佢，因為跌低都唔會有着數。「哨牙蘇」一定要用實際行動去令外間改觀，唔係未來都幾難有運行。利物浦今晚英超主場鬥雷丁，紅軍一定喪攻，但門將連拿缺陣後防唔掂，雙方入波唔會少，捧大。（有線304及204台周六晚10時直播）