阿特蘭大搶Ｗ賀「牛一」

猪拉多纳

今次集中同大家研究意甲，其中一場由阿特蘭大主場對錫耶納。最近意大利貝加莫市認真熱鬧，事關剛過去星期三為球隊阿特蘭大創會105周年紀念，球隊有多項慶祝活動舉行，而今場比賽更加成為慶祝周期嘅壓軸盛事。阿特蘭大「牛一」，球員士氣大增，當有助提升爭勝機會，主W值得捧場。

（周日晚9時開賽）

阿特蘭大為答謝當地球迷多年來嘅支持，今場只需付出1歐元就可入場睇波。另外幾位球隊名宿都會入內撐場，為球隊打氣兼賀生辰。既然今晚係阿特蘭大生日派對，到訪嘅錫耶納自然識做，無謂令主人家掃興。再講，錫耶納點會兩梳蕉參加派對咁寒酸，肯定會有「禮物」相送。意大利球隊最鍾意搞關係，錫耶納送禮有乜出奇。
基爾禾主場唔赦費倫

另外，基爾禾主場對費倫天拿，主隊受讓可捧「讓球主勝」。費倫天拿今季倚重祖維迪，惟進攻點太過單一反令對手更易防犯，加上費倫天拿今季聯賽作客未取勝，數據上難讓基爾禾。最後巴勒莫主場對拖連奴，巴軍教練加斯柏連尼一向以進攻為主，有前冇後打法好容易構成大量入球。