愛斯賓奴開齋良機

猪拉多纳

家陣天氣開始轉涼，各位朋友出街記得着多件衫呀！秋風起，亦即係食大閘蟹嘅好時機，不過小妹呢期莫財，各方好友如讀到此稿，請踴躍邀請小妹共進蟹宴喇，哈！除咗銀根短缺，近排小妹又幫公司搞個Mega Show，搞到成個禮拜都冇放過假，勁慘囉，好彩今晚又有超級大奸狗華歷簡奴登場，希望愛斯賓奴畀心機炒起「簡奴」，幫小妹洩憤啦！

早兩期小妹都同大家介紹過，呢隊華歷簡奴有幾奸o架啦，吖，點知呢隊衰波畀華拉度列炒完6:1之後都未搵夠，之後嗰場聯賽竟然極速反彈，以2:1砌低拉科，扮晒西甲食神，係要你估佢唔到，跣投X人士一鑊先安樂！
往績食住「奸狗」華歷簡奴

不過咁，小妹就最鍾意同「衰人」玩遊戲，嗱，今晚又係華歷簡奴嘅搵食好時機喇，事關對家愛斯賓奴到依家都未開齋，喺西甲包緊艇，守將域陀艾華利斯又話要停賽，但咁嘅環境，愛斯賓奴仲學人讓半球低水？足智彩仲撳到個主W得1.74倍？擺明有嘢啦！仲有呀，小妹上網搵過料，原來華歷簡奴件守將佐迪阿馬特係問「賓佬」借番嚟嘅，雖然阿馬特今仗唔出得，但兩會關係有幾密切，唔使多講啦！

睇埋對賽，原來愛斯賓奴近6次對住華歷簡奴，竟然錄得4勝1和1負，上季仲喺主場炒「簡奴」5:1添，有咁靚嘅數據支持，愛斯賓奴個主W值得一捧o架！
微博傳情：榮升契媽開心到喊

好開心呀，我做契媽啦！上星期小妹位好姊妹生咗個寶貝囡囡，眼仔睩睩咁勁得意，睇見都想錫一啖！見到老友榮升媽咪，小妹真係堅感動，見到BB嗰一刻，仲忍唔住開心到喊咗出嚟添！BB你放心啦，契媽一定會錫到你燶，等你開開心心咁快高長大！