中环英雄见真章

猪拉多纳

　　第六场三班2200米，「中环英雄」初出表现平平，或是出闸「甩咳」造成後遗，打乱了整体发挥，以及角逐心情。翌仗再跑相同路程，演出大有不同，转用不太合适放头跑法（头三段步速拉计正常），可以放到最後直路中段，最後攞到第四名，算係幾叻。

　　此马自从转到姚廐後，甚少跑谷草，两次咁大把，结果两场都有Q，其中一场就係谷草2200米（初跑该程），当时负127磅，虽然输畀「佳景良驹」三个幾身位，但压倒今次又同场嘅「胜利福星」，论沿路走势並唔曳。经过两场热身，终於选择增程，连配搭都执正埋，呢场应该係重现自己能力时候。

　　第七场三班1650米，唔知点解「豁达潇洒」上场跑得咁差，係赛事形势唔就？抑或前仗搏攰咗？可能都有关连。睇佢复课试跑唔係「死牯牯」，依然幾好势头，就当上场係回一回先输。今仗早段步速唔会太慢，6档未必被顶在三叠，希望守到二叠中间，做妥留放。总之，前仗步速慢一样冚到上嚟有Q，仍然觉得係超高难度动作，除非今仗再唔得，先至会死心。