巴塞抱孫收大禮

猪拉多纳

今晚上演歐聯分組賽第三輪賽事，G組巴塞隆拿坐鎮魯營主場迎戰些路迪。「地上最強」有腳風順到不得了的美斯，配埋兩翼韋拿、阿歷斯山齊士、柏度洛迪古斯、基斯甸泰路等，火力全開下，要擊敗些路迪毫無難度，不過巴塞防線表現得人驚，隨時畀些路迪偷襲入波，入球中位數3.5球照捧大盤。

（有線62及202台周三凌晨2時45分直播）

巴塞剛於西甲同拉科魯尼亞合演一場經典賽事，最終巴塞險勝5比4，王牌美斯又大演帽子戲法，近兩仗勁轟5粒，啱啱出世嘅ＢＢ非常旺佢，最重要係佢同法比加斯默契十足，兩人經常互傳配合，就能撕開對方防線，淨係計上仗，法比仔踢大半場便完成「助攻帽法」，狀態返晒嚟，加埋兩翼柏度洛迪古斯同基斯甸泰路弗到漏油，如此火力都咪話唔得人驚。
首輪贏斯巴達有辦睇

不過，巴塞自碧基同佩奧爾受傷後，中路防線即漏洞百出，近4仗狂失8球，無論用桑治、艾迪安奴夥拍馬斯真蘭奴，都未能予人信心，加上防中布斯基斯今仗停賽，防線危機四伏。還記得巴塞首輪分組賽主場對莫斯科斯巴達險勝3比2，兩個失波都係輸突擊，今場面對些路迪一對當弗箭頭加利賀柏同森馬拉斯，隨時歷史重演，一於追大盤。