喜乐洋洋生豪欢乐时光咁都得

猪拉多纳

　　今季跑过一次C栏，赛果相当典型！普遍冇得追、内档好、前置着数，如果唔係忽然转向，买後上马要考虑清楚。而今晚骑师以韦达、潘顿及柏宝多恶马，不过，好多赔率都係偏热。　　

　　第1场   第五班（40-0分）1800米

　　「更捷胜」长期追唔切，经常唔好彩抽外档，呢次唔例外，视乎际遇及发挥如何，计马五班当然超。

　　「雅趣」上赛前建议跟多场，因为暑後嚟得好，初出唔掂或与未热身有关，而上赛的确有番走势，可再追。「发达心声」此程能力有晒證明，係担心老马搏完一场，唞一个月未够。「给力」係呢类路程马，内档亦帮到，因为目前仍觉跑姿唔好。「彩虹幻影」由田转谷，较合脚法。　　

　　第2场 第五班（40-15分）1200米

　　「钻饰天使」临场行圈情绪乖晒，近期试跑亦变得内敛，进度又比前好，本身跑此程或比田草仲好，有埋1档，令胜望更大。

　　「上海先锋」如果交得出上赛水準，在今场仍有资格争冠军。「海豚」转场唔係冇变数，好与坏难定，乐观想法的话，要尊重此匹上场轻胜头马。「千笑」未热身点都蚀啲。「满贯之宝」和「明海光辉」排外档唔敢拣。「超胜」落到五班，冇理由仍会捱打，希望加配件有帮助（历年来两次初加配件均入围）。

　　第3场 第四班（60-40分）1200米

　　「但求胜」一向好少贴，唔係落咗四班，唔係排埋内档，根本唔会谂，呢场条件算係理想，但始终未出头，过热不博W。

　　「名列前茅」及第四场初出廐侣情况相近，若论进度，佢比较吸引，睇脚法及成熟程度，初出跑谷草应该冇问题。「神童」胜在準，此程好少冇前四名，唔拖一注硬係心掛掛。「日月晖华」上赛係追得幾好，而今场匆出，上季试过7日内跑两场赢马，惜档位曳，好睇早段际遇。「银飞龙」转场希望「虾」到对手，却经常失运，又係搏来搏去未出头嘅处女马。　　

　　第4场 第四班（60-40分）1200米

　　「喜乐洋洋」跑完一场工夫唔同晒，整课大闸用以提升状态，大告此手法少用，而睇大闸表现，总算迫落去有反应，起番八九成，四班够争有馀。

　　「生豪」有好档唔使似上场留得太後，跑法变得自在，能力将增强。「欢乐时光」整体条件係冇第三场廐侣咁好，太热更不宜博W。

　　「开心驾到」成日得个追字，正於减分期之内。「咁都得」10档，一定放，未必係坏事！睇马依然勇。「劲信心」对上两季一落四班，首仗即有表现，呢匹冷门可以考虑。　　

　　第5场 第四班（60-40分）1650米

　　「威老虎」讲过好多次，此程可能係最有把握路程，上场明显係新鲜感，始可转跑法在短途入围，开气後加程及转场，因应1档或採中置跑法，将得到充分发挥。

　　「雪米糍」唔係唔使担心10档、重磅及被动跑法，就算四班超级都係咁话，拖脚尚可。「叫关快」近态未及水準，至少仍觉身圆圆，但季内操练进程算係完整，本身又特利休出，小心出冷。一对徐廐马以「宇宙骏驹」较好跑。「足智多谋」搏到第三回，可能有风险，TF脚才考虑。　　

　　第6场 第三班（85-60分）2200米

　　「中环英雄」跑法机动，守啱位，在三班谷草长途够争，加上，之前已热身足够，换人及转场，应该係出击时候。

　　「驾翠」跑完一场，对提升状态起到作用。「真慷慨」始终未跑过谷草长途，有级数亦不宜睇得太高。「帝豪名驹」未返到锐利之时。「高友劲」近况起得唔错，係输点级数，可争位。「飞快无敌」跑完一场，期望有进步，一如部分廐侣一样，而此程亦可胜任。　　

　　第7场 第三班（80-60分）1650米

　　「豁达潇洒」上场或输际遇，总之，前仗克服慢步速唔简单，希望今场交得到当时水準。「一团威」劣档焗留，唧一段跑法曾经好过，而省完一场亦明显靓咗。「喜竞宝宝」及「首饰孖宝」三班稍有卡士，但各有不足之处。「军士」博回完一场有番体力，今场赚跑法争P。「太阳海岸」排1档，可能减低气量要求，初跑此程唔排除应付到。　　

　　第8场 第三班（80-60分）1200米

　　「自由胜」、「劲势」及「强风骏马」为今场3匹轴心马；前驹上场输一步冇得好讲，老马有一个月回气，预期维持到表现。「劲势」衰在排档差，未免增加风险，计马三班唔会留得耐。後驹档位内移，威力较上赛强。

　　「珠光宝气」希望蚀位程度冇上赛咁严重，便有机会入围。「妙不可言」要考验三班能力。「旋风魅力」暑後进度平平，热完身再算。