撐多蒙特拆「艦」

猪拉多纳

今晚歐聯死亡D組大戰，由「蜜蜂兵團」多蒙特主場迎戰「銀河艦隊」皇馬， 上屆多蒙特喺歐聯分組賽6戰得4分包尾出局，明顯志不在此，但今屆踢咗兩場就攞到4分，上輪作客曼城亦喺優勢之下同對手打和，似乎決心要喺今屆歐聯攞好成績！心態決定一切，如果佢哋今晚喺皇馬身上成功搶分，對出線有好大幫助，戰意旺盛兼且主場出擊隨時有驚喜，受讓嘅1.68倍「讓球主勝」抵博。（有線61、201及中央5台周四凌晨2:45直播）

「蜜蜂兵團」今季喺德甲表現飄忽，畀榜首拜仁拋離12分想再成功衞冕難過登天，不如疊埋心水喺歐聯闖一闖啦！佢哋對上兩季踢出高效率又富侵略性嘅足球，連拜仁都被比下去。雖然香川真司、紐尼沙軒同巴里奧斯相繼離隊，好在多蒙特戰力依然有番咁上下，羅拔利雲度夫斯基同馬高列奧斯等戰將，一樣可以保持機動又實際嘅踢法，佢哋透過不停跑動嚟製造空位撕破對手防線，好似上輪對曼城嘅演出就令人拍爛手掌！
防線大執位攻守失衡

一個短短嘅國際賽檔期，就令皇馬後防增添咗馬些路、艾比路亞、法比奧干查奧3名傷兵，搞到莫連奴都要嚟個大執位，不過由上周聯賽所見，艾辛客串左閘令皇馬攻守失衡，特別係佢只可以專注防務，助攻嗰part始終冇馬些路咁強，往往搞到C朗畀對方集中防守，威力自然大減。

中堅方面，亦因為沙治奧拉莫斯移咗去踢右閘，由華拉尼取代佢嘅位置同比比拍擋令到穩健性大減。傷患問題搞到「銀河艦隊」攻守力都大大削弱，今場大戰自然係多蒙特嘅搶分良機，莫講話和波攞1分，憑主場之利爆冷贏埋都唔係冇可能，一於支持「蜜蜂兵團」受讓嘅「讓球主勝」啦！

歐聯D組

張峰來料：「讓球主勝」
銀河艦征德國僅贏1場

‧皇馬歷來23次作客對德國球隊，足足輸咗16場，仲要贏得1次咁大把。

‧皇馬今季6場作客成績為2勝1和3負，落敗率達5成勁失9球。

‧多蒙特今季5場主場賽事取得4勝1負，合共攻入12球，火力不俗。
博皇馬1.72倍「第一隊入球」

雙方呢排都有唔少傷兵，結果多蒙特喺魯爾區打吡主場不敵史浩克04，嗰邊廂皇馬喺防線天殘地缺之下，喺巴拿貝依然淨勝切爾達2粒，形勢各走極端，今場隨時係質素較高嘅皇馬先開紀錄，跟手多蒙特追和甚至反勝嘅格局，皇馬1.72倍「第一隊入球」要得過。