馬拉加得米

猪拉多纳

意甲頹軍AC米蘭今晚喺歐聯C組作客馬拉加，成敗還看兩軍教頭！馬拉加教練比歷連尼喺球隊危難之時主持大局，結果「星散」之後仍然有貨交，相反「紅黑軍團」嘅主帥阿里基實力見晒底，連球員都唔畀面喪插佢，小妹梗係撐教得其法嘅比帥，捧馬拉加1.83倍主勝啦！（有線63及203周四凌晨2:45直播）

馬拉加季初因為班主閂水喉搞到冇糧出兼賣走辛迪卡索拉等主力，依家可以壓住皇馬守住個西甲第三，其實都係多得比歷連尼堅持唔劈炮咋！前鋒沙維奧拿就話全靠比帥團結隊波先可以齊齊度過逆境，仲盛讚佢嘅戰術勁掂！咁又係呀，沙維奧拿同埋祖亞昆經比帥調教下鹹魚翻生，今季馬拉加開季到依家又淨係輸過一場波咁大把，就知比歷連尼係有料之人啦。呢隊歐聯初哥喺分組賽發窮惡連贏兩場，食住個勢加上過往12場歐洲賽只嘗1敗嘅佳績，又使乜怕頹爆嘅米蘭先？
邦利拿插阿里基亂排陣

一個天一個地，米蘭開季8場輸足5場，平埋封塵70年嘅球會最差意甲開季紀錄，認真羞家！其實以米蘭嘅陣容，照計唔會衰到幾乎要護級，除咗球員心態問題外，小妹覺得教練阿里基唔夠班先係真正原因囉！

最慘嘅係家陣連球員都唔撐阿里基，邦利拿就話：「我哋踢兩個中場嘅效果唔錯，但教練無啦啦用尼祖迪莊做防中配搭兩個進攻中場……家陣我哋嘅狀態同埋心理都好脆弱。」可想而知士氣低到咩地步啦！就算阿里基今個禮拜下令閉關操練，一時三刻睇怕幫唔到幾多，而且西班牙球隊不嬲係米蘭嘅剋星，皆因「紅黑軍團」近11次喺歐聯遇着西班牙對手，有10次都贏唔到，至弊係羅賓奴啱啱又傷過，柏圖狀態又未十足，淨係靠艾沙拉維數胡，睇怕都凶多吉少喇。

歐聯C組
馬拉加今季歐聯冇失波

‧馬拉加今季4場歐聯賽事不失1球。

‧AC米蘭近9場歐聯賽事中共出現6個12碼，其中5球係由對手獲得。

‧截至賽前，馬拉加嘅大門喺今屆歐聯只被射中過4次，呢個數字同皇馬並列為最低。
歐聯賽制

32支球隊分8組進行雙循環分組賽，每組首、次名躋身16強淘汰賽，第3名轉戰歐霸盃。