漢堡受讓下盤「格」

猪拉多纳

雲達華治回歸漢堡後，同南韓猛將孫弘民聯手撐起班波，令呢支老牌球會暫時走出上季嘅護級陰霾，今晚作客死晒火嘅奧格斯堡，要攞分照計冇難度，今場奧格斯堡讓平半，1.84倍下盤係小妹心水。

（有線64及204周六凌晨2:30直播）

漢堡今季成績大躍進，其實都係多得雲達華治回巢，呢位荷蘭中場話雖然家陣係有力爭下屆歐洲賽席位，但佢同班隊友仍然冇忘記要護級嘅日子，今場一定唔會輕敵咁話，暗示唔會放過奧格斯堡喎。
華希亞治傷韌帶抖3個月

查實漢堡救世主點止「華治」一個，韓援孫弘民同樣功不可沒，雖然喺德甲搵食嘅亞洲球員以東瀛兵較吃香，但呢位南韓代表絕不比乾貴士、清武弘嗣等遜色。孫弘民開季到依家已經入咗4球暫時做咗球隊神射手，充分顯示佢嘅把握力，難怪多蒙特同利物浦都想搶人啦！有佢同雲達華治拍住上，要攻陷奧格斯堡搶分梗係Easy job啦！

奧格斯堡近況終於稍稍回穩，近3場保持不敗兼且喺雲達不萊梅身上取得首場勝仗，好衰唔衰喺呢個時候又傳嚟壞消息，後防主力兼隊長華希亞治整傷韌帶要抖3個月，都咪話唔大鑊！皆因佢哋開季到依家8場波入得5球，「榮升」德甲火力第2弱球隊，想攻已經攻唔入，家陣防線又有要員唔踢得，想保住1分都唔容易。