禾堡郁馬加夫勢反彈

猪拉多纳

馬加夫終於被炒了，事實上禾夫斯堡高層對佢實在太寬容，銀紙不斷地花，人才不斷地浪費，換來卻是將帥不和，民怨沸騰，士無鬥志，成績一直處於谷底，呢位過氣固執教頭捱到呢一刻至被炒，已經係一個奇迹。

禾堡能夠容忍馬加夫咁耐，完全係念在佢喺三年幾前為球會立下不世之功，贏得球會史上首個德甲冠軍寶座，但禾堡當年嘅成功，全靠同時擁有米斯莫域、迪斯高同加菲迪三位當時得令嘅歐洲頂級攻擊手，馬加夫根本唔需要乜嘢戰術，淨係將進攻工作交晒畀佢三個，其餘八個球員專責防守，戰鬥力已經足夠強大，加上適逢拜仁慕尼黑同其他一眾德甲球隊當時都處於低潮，就咁畀佢寫下球會光輝一頁。

為禾堡立下大功，馬加夫立即轉投史浩克，佢喺藍軍不斷揮霍，瘋狂收購球員，搞咗季半未立寸功被炒，史浩克球迷對佢恨之刺骨，之後禾堡念舊情重新收留，但佢嘅問題變本加厲，錢使得更多，用人又冇耐性，狂操猛練令球員怨聲載道，又喜歡將失敗責任加諸於主力球員身上，令佢神憎鬼厭。
失意兵醒神晒

禾堡今晚作客對杜塞爾多夫，由助教高斯拿暫掌帥印，佢喺兩年前都做過替工，頂替當時被解僱嘅艾明費，帶隊15場取得9勝2和4負佳績，對呢個崗位駕輕就熟，喺馬加夫被炒後，佢第一時間約見球員傾偈，好似迪亞高、拿杜、卡積亞同巴斯杜斯等優質球星，原本都諗住會畀馬加夫雪藏，如今有機會解凍，當然要盡踢身價波向前主帥一顯顏色，呢班球員技術經驗都遠勝於杜塞爾多夫戰將，Alwin相信佢哋有條件打翻身仗，受讓更加着數到暈，1.65倍「讓球客勝」係信心之選，進取捧埋3.2倍客Ｗ。

（周六晚9時30分開賽）
Alwin推介：

禾夫斯堡讓球勝★★★

賀芬咸 讓球勝★★★

史浩克04讓球勝★★★