阿仙奴勢頹QPR乘機抽水

猪拉多纳

近期頹爆嘅阿仙奴今晚哀兵上陣，咪以為喺酋長球場迎戰聯賽8戰未嘗一勝嘅昆士柏流浪就好易食，阿仙奴連輸2場後信心盡失，就算韋舒亞據聞可以復出亦難以即刻反彈，實在冇乜資格讓波，今晚呢場「倫敦打吡」冷味十足，冷敲3.3倍昆士柏流浪「讓球客勝」好過。

（有線200及300、廣東體育周六晚10:00直播）
兵工廠3號門神靠唔住

昆士柏依家處於聯賽榜榜尾，相信好多球迷都大跌眼鏡，始終QPR今季簽入朴智星、保辛華、格尼路等大牌球星，人腳同成績唔成正比。好彩，領隊曉士近期已執番正隊波，成績慢慢回升，睇番QPR近幾戰雖然贏唔到波，但表現唔差，既然上星期諾域治都可以喺阿仙奴身上搶3分，只要昆士柏保持鬥心，要插多「兵工廠」一刀唔係冇可能。

阿仙奴季前賣走尹佩斯嘅問題開始浮現，辛迪卡索拉無疑係絕佳收購，填補番前季離隊嘅法比加斯個位，不過講到前鋒，無論係基奧特、普多斯基或者謝雲奴，都同尹佩斯嘅射術差幾皮，最弊係阿仙奴一對正、副選門神施捷斯尼同法比安斯基都抖緊，第3門將文路尼表現飄忽，肯定係計時炸彈，今仗又邊讓得起昆士柏流浪？
張峰來料：昆士柏流浪（讓球客勝）