橫傳？直線？服了評述員！

猪拉多纳

上個禮拜睇歐聯直播，聽見有位評述員哥哥，講得好鬼趣致，要同大家分享一下。

嗰晚溫度睇多蒙特對皇馬，場波的確幾刺激，快上快落，中後場球員一控波，即刻有人標搶，諗多一秒都出事。不知是否太緊湊，令評述的哥哥仔喘不過氣，除說話節奏外，連思維亦受到影響，作出了奇妙的旁述。

「我哋睇吓今次攻勢，佢哋究竟係橫傳定放直線先。通常一場波，放得直線多，就會加快節奏，好睇咗，但如果橫傳多就會比較悶嘞！」

此位哥哥仔真厲害，直傳橫傳這個難以理解的動作，可以如此精闢地分析，讓人可以了解背後複雜的符號，着實令人佩服得五體投地。身邊友人問溫度，你是否在說反話，貫徹一貫的尖酸刻薄風格？我對此評述現象已習以為常，連結到當今社會，又有多少年輕人，可以做到說話既到Point，又有個人風格呢。這是一個社會現象，我們不應要求評述員脫離社會現況，講得唔好？適應它吧，始終選擇權在你手呢？
難忘阿叔Brian Moore

可能溫度年紀開始大，越發懷念以往好事，評述員亦然，林尚義根本就係足球界董驃，鮮烈個人形象只此一家，前無古人，後難有來者。何靜江勝在夠大聲，有「吉士」狠下批評，一團烈火難復見。

不止香港，英國當然也有經典講波人，70後球迷當年看明珠台「英國足球大賽」，那些錄影片段亦睇到津津有味，比起現在晚晚直播，更加彌足珍貴，半禿主持人Brian Moore滋油淡定，親切大方，好似朋友般向你介紹球賽，英國波能令香港人癡迷，這位已作古的前輩，有極大功勞呢！

最後，有讀者會話︰你咁叻，你去講呀！不錯，溫度好有信心，若然有機會，水準將超越現時市場上百分之五十的評述員；況且，誰說寫食評，一定要廚藝好呢？Comment就是如此，明未？