拜仁歎私房菜舔晒「利」

猪拉多纳

德甲今晚有「全勝之師」拜仁慕尼黑主場迎戰利華古遜，攻擊力同防守都冠絕聯賽嘅主隊，有「小飛俠」洛賓復出，相信可以持續強勢，今晚對住「私房菜」利華古遜要攞晒3分易過借火，1.6倍「讓主」捧得過。（有線61及64周一凌晨0:30直播）

聯賽8戰全勝嘅拜仁慕尼黑個勢的確好到得人驚，每場平均入3球，而且咁多場夾埋只係失過2球，條防線連祖雲達斯、車路士同巴黎聖日耳門呢啲防守唔錯嘅勁旅都冇得比呀！今場就算列貝利要缺陣，替補嘅梳頓沙基利都完全可以勝任，何況弗到漏嘅湯馬士梅拿同文迪蘇傑今季夾埋已經入咗13球，洛賓又傷愈復出，根本唔使擔心火力問題。
利華18次作客安聯攞得2分

利華古遜喺希比亞帶領下亦都v入佳境，連埋盃賽已經錄得8場不敗嘅佳績，之不過佢哋不嬲都有畀拜仁食住嘅弊病，過往18次造訪安聯球場，居然只得2分進帳，主力中堅卡特歷仲大有機會缺陣，睇怕佢哋嘅不敗走勢，今場都要喺慘敗中結束喇。