飛燕諾阿積士駁火做大騷

猪拉多纳

上周中歐聯喺主場反勝曼城嘅阿積士，今晚將回歸荷甲，作客出戰喺積分榜同得17分嘅飛燕諾，兩雄相遇邊隊輸贏好難講，但阿積士今季聯賽作客入得又失得，今場大細中位數未有上調，1.5倍「大」要捧。（now639台周日晚7:30直播）
客軍後防有「失球保證」

目前喺荷甲仲剩番兩支不敗之師，阿積士就係其中之一，只不過佢哋9場波淨係贏得嗰4場，作客不穩係佢哋成日失分嘅主因。除咗首場作客大炒奈梅亨，其餘3場作客唔係領先下被追和、就係早早失波要苦追，對住荷華高斯仲要喺領先優勢下，完場前連失2球被逼和3:3。前鋒史基賀臣同中場卡拉臣等人雖然因傷缺陣，但賴恩巴布同杜比亞斯辛拿近期着晒火，前面有入球保證之餘，後面都有「失球保證」。

對手飛燕諾今季主場3戰2勝1和未輸過，夠晒硬淨，不過近幾場佢哋都好肯放開懷抱去攻，已經連續4場開大之餘，仲要入10球兼失8球，同阿積士有得揮。就算今場佢哋個箭頭施高施斯同中場莫高祖缺陣，好彩球隊神射手兼中場核心恩馬斯繼續擔正，進攻火力唔成問題，雙方勢必合演入球騷。