多蒙特作客捱「細」界

猪拉多纳

德國盃第二圈，上屆冠軍多蒙特作客乙組仔阿倫，「蜜蜂兵團」多蒙特今季演出稍為失色，而且球隊兵源並非充裕，三線作戰之下，難以場場搏盡。球隊由於近期出現傷兵問題，教練高普更加會錫住用班球員，權衡輕重之下，出戰較次要嘅德國盃，「蜜蜂仔」隨時會勒住踢，但求小勝晉級已收貨，馬會開出大細中位數調升至3.5球，Mic少建議敲入球細。

（無綫翡翠台周三凌晨3時30分直播）
三條戰線踢殘正選

多蒙特喺聯賽已落後拜仁慕尼黑9分，好大程度上因為作客表現太差，包括歐聯在內，近六場作客僅一勝，睇賽績已對佢哋今仗存有戒心。「蜜蜂兵團」最大問題係兵源不足，基本上靠同一班正選球員應付各項賽事。早前只係左閘舒姆沙受傷，教練高普就被迫變陣，將中場施雲賓達移後客串中堅，可想而知多蒙特人腳非常緊絀。
阿倫鬥名牌賣力冧粉絲

事實上，多蒙特並非富豪球會，冇兩套人腳輪換，來到德國盃，如果唔想踢殘班主將，唯一選擇係避重就輕勒住踢，盡快取得領先優勢後可以歎慢板，所以今仗預期多蒙特小勝居多。

另外，主場擁有萬一座位嘅阿倫實力的確同客軍有明顯差距，但畢竟喺自己地頭遇上名牌球隊，球員應會特別落力，就連fans打氣都落力啲，絕對唔會任由對手宰割。更何況盃賽往往係爆冷溫床，以阿倫近三次主場僅失一球嘅表現，恐怕多蒙特要花一番工夫先至咬得入佢哋。今場客W熱到爆，Mic少認為毫無投X價值，捧「讓球客勝」亦有暗湧，入球細相信係最合理選擇。
德國盃推介

布倫瑞克勝

緬恩斯 讓球主勝

史浩克04 細

阿倫 細