小白拉隊開「大」騷

猪拉多纳

尋日係「小白」恩尼斯達喺巴塞一隊處子登場10周年大日子，今晚「地上最強」喺西班牙盃第4圈首回合作客丙組艾拉維斯，「小白」大有機會帶領一班後起之秀做「大」騷，咁高興嘅日子即使中位數係3.5球，都照捧1.95倍入球大！

（now632台周三清晨5:00直播）

喺2010年世盃為西班牙一箭定江山嘅恩尼斯達，為巴塞一隊上陣10周年當然係大事啦！西班牙《每日體育報》就重溫番當年只得18歲嘅「小白」，喺2002年10月29日歐聯分組賽作客布魯日嘅情況：「佢嘅臉孔同身形都成個小朋友咁，但球技就恍如魔術，令到尹戈爾（當時嘅巴塞教練）放膽起用。」恩尼斯達接受巴塞官方雜誌《Revista Barca》訪問時，亦都講起呢段寶貴回憶：「當時為一隊上陣，係夢想成真！」
巴塞B隊小將孭重飛

今年28歲嘅恩尼斯達已為巴塞贏過19項大賽錦標，亦係西班牙首奪世盃及衞冕歐國盃功臣，更常被譽為世上最出色嘅球員之一！「小白」經過上仗聯賽對華歷簡奴休戰後，隨即拍住停完賽嘅馬斯真蘭奴齊齊復操，西班牙《體育報》指參與操練嘅大部分係後備及B隊球員，美斯、沙維同域陀華迪斯幾個都獲准休息，但就算巴塞今場留力，「小白」同其他大佬帶住班後起之秀，根本唔需要擔心火力問題。
艾拉維斯丙組一哥差一皮

雖然主隊艾拉維斯要面對剛剛破咗球會紀錄、聯賽9輪5場作客全勝嘅巴塞，但教練卡路士格尼路就不甘提早認輸，更豪言：「我已經同班球員講咗，我哋係有機會贏波o架！」不過佢哋就算係丙組榜首，實力同巴塞青年軍仍然相差一個聯賽嘅級數，想阻止巴塞開入球騷慶祝球會同恩尼斯達「相愛10年」？難啲喇！
巴塞作客入波多

‧巴塞隆拿喺最近263場正式賽事中，控球率均高於對手。

‧韋拿今季有落場嘅賽事，巴塞全部獲勝。

‧巴塞今季到目前為止嘅29個聯賽入球中，有19個嚟自作客。
巴塞超班「讓客」熱膽

艾拉維斯多年前喺歐洲賽曾經有唔錯表現，但呢支巴斯克球隊已經今非昔比，喺聯賽對皇家蘇斯達B隊都要輸，更何況面對有恩尼斯達擔大旗嘅巴塞隆拿？而且巴塞今季作客特別多波入，1.42倍「讓客」雖嫌稍熱，但用嚟做過關膽都唔錯o架！
西盃賽制

採主客兩回合淘汰制，今輪為第4圈首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則互射12碼決勝。