每逢盃賽脫胎換骨 雷丁夠料爆廠仔

猪拉多纳

歐洲今晚係盃賽之夜，英格蘭本土就上演聯賽盃16強。雷丁喺英超雖然仲未開到齋，但佢哋去到英聯盃就脫胎換骨，對上兩圈都反勝對手晉級，今次主場面對以「廠仔」應戰嘅阿仙奴，有力爆冷殺入8強，主場受讓1.9倍「讓主」要捧。

（開賽時間：周三凌晨3:45）
阿仙奴小將掛帥 韋舒亞休息

雷丁喺英超4和4負仲未敲響勝鼓，領先下欠缺集中力係佢哋嘅致命傷，再咁落去真係聽降班。不過佢哋一到盃賽就識得「自動修正」呢個問題，對住彼德堡同昆士柏流浪仲喺落後劣勢，反勝對手晉級，可見佢哋對呢隻盃嘅重視程度。唔興留力嘅雷丁，今晚繼續有普格恩耶克同路爾亨特成班主力落場搏殺，有力頂得住阿仙奴。

阿仙奴方面，領隊雲格除咗講明唔會派啱啱傷愈復出嘅韋舒亞落場，謝雲奴同阿歷士張伯倫都有傷在身，預料佢會繼續排出「廠仔陣」，以馬田安夏、恩拿利斯同基拿比呢啲小將掛帥。呢班「廠仔」對住英甲高雲地利就話掂啫，對住同屬英超嘅雷丁？想晉級有難度喎！