落難格流越級有「大」志

猪拉多纳

今晚蘇聯盃八強戰，久違了嘅落難豪門格拉斯哥流浪，坐鎮主場挑戰蘇超五哥恩華尼斯。雖然丙組仔格流今季流失唔少主力，但大軍上下一心，誓要喺盃賽發圍，遇上有前冇後、打死罷就嘅恩華尼斯，似係鬥攻格局，勝負難料，捧入球大好路。

（周四凌晨3時45分開賽）

上季宣布破產、今夏被各級球隊投票「隊」落丙組嘅格流，由於「筆直」唔多，多名主力如賴史密夫、尼古拉哥恩、史提芬戴維斯等紛紛跳船，好彩喺名宿主帥麥哥斯帶領下，大力提拔新秀，希望完成「三年衝超」計劃。經過一番努力，依家格流位居丙組榜首，有餘力一爭盃賽，睇番該隊今屆對上兩圈蘇聯盃賽事，均喺主場越級戰勝福爾柯克及馬瑟韋爾，一眾生牯仔表現突出，其中射手麥高洛治更頻有士哥，今晚誓要喺自己地頭再打老虎。
恩華尼斯攻強守弱

另一邊廂，恩華尼斯中前場幾位主力如比利麥基、列治科倫、安德魯史軒尼、羅斯德拉柏輪流發威，火力強勁，但該隊打法太過進取，使防線弱不禁風，其聯賽作客得失球之比為11對11，可見佢哋真係攻強守弱，預計今仗死性難改，作客格流照攻可也，呢場合演入球騷嘅機會高唱入雲，大盤捧得過。