愛斯賓奴「客勝」賀會慶

猪拉多纳

西班牙盃第4圈首回合今晚連場惡戰，其中焦點戰全西甲對壘嘅西維爾主場火併愛斯賓奴，主隊今場話明大執位會落唔少副選兵，反而「賓佬」啱啱慶祝112周年會慶，點都唔想衰鬥志秤高多少。西維爾讓波，力奇撐2.55倍「讓球客勝」。

（開賽時間：周五凌晨2:00）
西維爾出副選面目全非

本來論實力肯定係西維爾高一截，不過佢哋要留力喺西甲搶分爭入前列攞下屆歐洲賽資格，明顯係嫌棄西盃，想早輸早着。賽前有消息話，西維爾除咗中場杜查奧斯基因為膝部韌帶重創唔使預佢之外，亦會收起唔少正選，前線改派「雪櫃兵」雷恩斯孭飛。力奇收到風西維爾計劃緊將佢賣去土耳其，今晚想佢搏命都幾難。至於防線更係面目全非，平時上陣機會唔多嘅史柏希斯、安東尼奧隆拿、法斯奧同後備門將迪亞高洛迪古斯都會擔正，你話後防冇隱憂都冇人信啦！

至於「賓佬」呢邊，除中場艾賓拉傷大腿養傷、大門會由後備門神卡斯拿把守外，基本會以「夫添」應戰。佢哋喺啱啱過去嘅周日慶祝會慶，周一又為一個球迷銅像揭幕，打晒鑼鼓搶風頭，今晚為面子肯定打甩髀，以佢哋近排狀態回勇3場不敗走勢嚟睇，要頂住半力嘅西維爾應該冇乜難度！