葉士域治換啱教頭恰阿伯

猪拉多纳

今日有多場英冠賽事，阿King睇中葉士域治。呢班波本季戰績曳極，管理層近日終於搵到麥卡菲執教。呢名前狼隊教頭經驗豐富，至少應可為球隊帶來小陽春。今輪佢哋作客伯明翰，「阿伯」目前債務纏身士氣低落，葉軍受讓抵玩！

（周六晚11時開賽）
伯明翰人心惶惶讓唔起

葉士域治目前於榜下游苦苦掙扎，高層對主帥祖維爾忍無可忍，終於要請佢食無情雞，經過一番篩選後，請來麥卡菲揸旗。雖然佢初來甫到，但球隊換一換人轉轉運，可以帶來生機。伯明翰周身債，目前正搵緊買家接手球隊，盛傳會賣走陣中球星，依家人心惶惶又點踢好波？主場都讓唔起葉士域治！

另一場查爾頓主場對米杜士堡，米堡全面回勇已經五連勝，前鋒史葛麥當奴入波當食生菜，查軍狀態麻麻難讓波，捧「讓球客勝」。而錫周三主場撼彼德堡，雙方均位列榜下游，正面硬撼必搏命求勝，入波唔會少，捧大。